जब म हाइवे किनारमा उभिएको
कुनै पनि पारापेट देख्छु
बाबा सम्झन्छु।
एका बिहानै निस्किनुहुन्थ्यो बाबा
बोकेर कर्नी, मार्तोल, छिनो, बेल्चा
र बनाउनु हुन्थ्यो हाइवे किनारमा लहरै पारापेट।
त्यही पारापेटले
रोक्थ्यो टिस्टामा खस्नदेखि वाहन
रोक्थ्यो दुर्घटना
दुर्घटना रोकिएको देखेर रमाउथे बाबा
र भन्थे, देशलाई पनि चाहिन्छ पारापेट।
एकदिन
पारापेट बनाउँदा बनाउँदै खसे बाबा।
जब म हाइवे किनारमा उभिएको
कुनै पनि पारापेट देख्छु
बाबा सम्झन्छु।
